Chak tak leh huai takin awm phawt mai rawh

"Ka chhiahhlawh Mosian dan zawng zawng zawm tura thu a pêk che kha zawm tlat turin chak tak leh huai takin awm phawt mai rawh: i kalna apianga i lo hmuingil zel theihna turin i ding lamah emaw, i vei lamah emaw pensan hauh suh ang che." (Joshua 1:7 )

       Pathianin Joshua hnena thu a sawi hi tunlai thang leh tharte hian kan chik a va ngai tak em! "chak tak leh huai takin awm phawt mai rawh", " a ram leh a felna zawng hmasa rawh u" tih nen hian a sawi tum thu hmun ni lo mahse, a sawi dan kalphung chu a inang ve viauin ka hria. Pathian hian mitinte na tuar leh hrehawm hi a hmuin a hria a, mi tam tak tan chuan chu chu chakna an hmuhna tura Pathian remruat a nih rualin, mi tam tak na tuar chhan erawh helna vang pawh a ni thei, thenkhat na tuar chhan erawh Lalpa ropuina turte a ni thung. Tin, thenkhate erawh fiahnate pawh a ni thin. Chuvangin ringtu nun hi kawng nuam zawng hlir ni tura thlirtu tan chuan ringtu nun hi kawng hrehawm a ni a. Lalpaa rinna nghat tlattu ringtu tan erawh engkim mai hi lawmna tur hlir a lo ni. An chunga thil thleng zawng zawngah Lalpa lam an en fo avangin engkimtitheia thlazar hnuaiah muangin an chawl thin.
     
       "Chak tak leh huai takin awm phawt mai rawh" tih thu hian sawi tum a la nei a, a bak a la awm tih a ziak atang hian chiang takin kan hmu thei a ni. Kan tih tur chu " chak tak leh huai taka awm phawt mai" kha a ni. Chu mi awmzia chu Lalpaah chuan intichaka, a lam en tlat rawh tihna a ni. Mi tam tak chuan Lalpa tih tur hi tih kan lo tum thin a, Lalpan a ropuina puan chhuah a tum laiin, kan lo chet ve vak thin vang hian, Lalpa a che thei thin lo. Kan nunah enmaw kan tawn apiangah hian Lalpa hmasa berah kan dah a, engkimah amah kan rinchhan a, ama lamah kan innghat phawt chuan, tah chuan Pathian engkimtitheia chu a lo che chhuak chauh thin a ni. "Chak tak leh huai takin awm phawt mai rawh" tih hian mihring mihrinna lama inbuatsaihna a sawi lova, Lalpaah atanga chakna kan hmuh theihna kawng, ringtutan chuan tawngtai,Bible chhiar etc... te hi an ni.Chak taka awm tura Lalpaa inbuaisaih a sawi zawk a ni.

       A zawm chiahah chuan, "i kalna apianga i lo hmuingil zel theihna turin" a ti. Kan sawi tak ang khian "chak tak leh huai takin awm phawt mai rawh" tih hian sawi tur dang a la nei kan tih tawh kha. Chu a sawi tur chu "i kalna apianga i lo hmuingil zel theihna turin" tih hi a lo ni. Pathian thu hi kan ke atan khawng var a ni a, kan kawng atan eng a ni si a. Lalpa tello nun leh Lalpa tello indona chu a hlawhchham fo tih Amah Lalpa vekin min hriat sak vangin kan tana kawng tha ber, kan hmuinghilna kawng chu min lo kawhhmuh a lo ni. Nitinin indona hmuna awm kan ni a, hmuhtheihloh indona hi a nasa ber chu a ni. Thlarau sual nen indoin, Lalpa lamah kan tang fo theih nana ral thuam chu Pathian THU hi a ni a, hmuh theih loh thlarau sual ho do tur hian tisa leh thisen chakna hmang chuan hneh theih ziazang a ni lo. Chu thlarau sual chuan min hneh tumin min bei thin a, min hneh lohna turin keinin Pathian Thu hi kan invennan kan lo hmang ve tur a ni. Chu Pathian Thu lo chuan hneh theih a nih tlat loh vangin, chu kawng chu Lalpan nang leh kei kan tan min lo thlan sak a lo ni. Amen.

      Engtinge a sawi leh zel chhiar chhunzawm zel ila, "i ding lamah emaw, i vei lamah emaw pensan hauh suh ang che". Pensan lam thu a sawi vang hian mi rinawm lote chanpualah dah nghal mai lo la, khawvel tung chhoa kal hringfaah hian rinawm hi vang viau tur a ni. Bible atanga teh phei chuan pakhat te mah an awm lo. Chuvangin pensan lo  tura min fuihna hi pensan ching kan nih vang zawk a lo ni. Israel fate chanchin kan chanchin a ni a, chhui zel ta ila, vawi tam tak an lo pensan a, vawi duai lo Lalpa lakah an lo hel tawh a ni. Chu chu Pathianin a hrechiang em a, nghet taka ding turin min fuih a ni. He thu hi tunlai hian thalaiteah setana pawhin a hmang tangkai em em a, Pathian thu kan hriat mai maite chu setana hian a thik tawh bik lo, mahse zungkaia rah kan chhuah loh nan hian theih tawp chhuahin min bei ve a ni tih hriat a tha. Tunlai ringtu nun hi chhut ta ila, chiang takin kan hmu thei, tuman tih tak thlakin Pathian thu hi kan beingawrh peih tawh lo va, Ringtu ni reng chung siin kan pawm zau tawh em em a, Pathian thu aimahin kan thu hi Pathian thuah kan vuah zo tawh a, Pathian thu hi hmaikawrah chauh kan hmang zo ta  anih hi! Evange Ringtute hi kan va dingnghet lo em? A chhan leh vang chu hei hi setana idea a ni a, mite Pathian thu hre lo tura dan aiin hre mahse zungkai lo tura danbeh hi setana thil tum ber a ni. Biakin Pathian thu kan ngaihthlakte kan beng chuan hre mahse, a ngaihna kan hriathiam lohna turin kan inlum kan luh hnu hian min lak bo sak leh mai thin. Chu chuan zungkai thei loah min siam a, kan ringtu nun hi mite tan a parchhuak thei lo a lo ni.

        "I ding lamah emaw, i vei lamah emaw pensan hauh suh ang che" . Kan sawi tawh angin he indonaa kan chakna hnar ber Pathian thu a nih tlat vangin, chu thu chu kan pensan ni chuan kan chak dawn lo tih hi keini aiin Pathian vekin a hre chiang. Mahse Pathian hian mite thinglung ngaihtuahnate a hre vek a, pensan lo turin a thiltihtheina a rawn hmang dawn lo va, i pensan loh hunah chakna thar a rawn pe zawk ang che. Chuvang chuan a ni pensan hauh suh a tih che ni. Nang ringtu, kum za dawn lai mai lo ni tawh pawh ni mah la, rah i chhuah tlat si loh chuan engnge sawtna a neih chuan? Lalpan dingnghet turin a duh che a ni. Tluk leh ding awn ang mai ringtu nih hi thil hahthlak tak a ni. Lalpaah chuan chawl la, Anin a thawhsak mai dawn che a ni. Chawl tih hian awm mai mai lam a ni lova, amaha inghat leh amaha chakna thar lak hi a ni, tah chuan Lalpan engkim a thawh sak ve dawng che a ni.

       Hun khrih takte a lo thleng mek zel e, a lo thleng zel dawn bawk. Mahse chiai suh la, hlau hek suh, hengte hi thleng tur reng a ni si a. Hengte hi a thleng lo a nih chuan kan Lalpa ISua a lo kal thei dawn si lo? A kal tawh dawn vanga thil thleng mai a ni a, lawma au zawk tur i ni. He lei hi chu khualzinna mai a ni si a, thlamuang takin awm rawh, i ding leh vei thil thlengte khan pensan tir che suh se, Lalpa lam chauh en la, amahah chakna thar la thin ang che. Lalpa chu a hnai e, ringtute chu tihchepin kan awm zel dawn? Mahse he thu hi lo hria ang che, Pathian thu i sawi hian i sawi tur a zo ngai lovang, sawi tur dang i neih belh zawk thin ang. A chhan chu Pathian thu chu sawi phai lam a ni lova, sawi pun lam thu a ni. Chutiang bawkin ringtute hi nekchepin kan awm mek a, kan awm zel dawn. Nekchepin awm mahila ringtute chu kan pung zel ang.Khawvel hi chu kan chatuan ram a nih tlat loh avangin a awptu dik tak turin a lo la awp thuai dawn a, rinawm takin Lalpa rawngbawl la, huai takin awm la, dingnghet ang che. Thih thlengin rinawmin lo awm rawh tih thu hian i hnenah thu sawi thar leh se, chak tak leh huai takin awm phawt mai rawh, Lalpa a ngaihtuah em em ang che. Lalpan malsawm che rawh se....Amen .....