Thuthlungfate Ram

          Hringnun hi zinkawng chu a ni a, nun hi a sei emaw sei lo emaw, damchhung ni a sei emaw tawi emaw chu ai pawimawh zawk chu engtinnge i hman tih kha a ni, mi tam takin nun leh dam thlahlel em emin an boral a, mi tam tak ve thung chu nun thlahlel tawh si lo hrehawm tak chunga la dam reng lawi si te an ni.

          Khawvelah hianin khual zin leh cham mai kan ni tih hi hriathchuah nawn fo kan ngai a, hei tak hi setana pawhin hre lo tur leh haider turin min bei a, min thlem a, mi tam tak hruai boin kan awm leh thin. Khualzin kan nih vangin kan zin kawngah thil tam tak hmabak kan nei a, chu kan tawh turah chuan kawng nuam a awm angin kawng hrehawm kan zawh chang pawh a awm thin.

         

          Israel fate kha Pathian ram a pek tur Kanan ram chu panin nitinin hrehawm tam tak an paltlang a, kawng nuam an zawh changte pawh a awm. Anmahni lam atang chuan Pathian pek tiam ram " ram tiam" panin an kal a, mahse kanan ram lam panin an kal reng bik lo. A chang chuan a let zawngtein an kal thin a ni. Thlalerah mi tam tak an thi a, an riltam vang a ni lo, an hel vang zawkin. An tum ram kanan ram chu kum 40- chhung kal em em chu a ni lo. Ngil taka kal chuan thlen theih mai a ni nain, kum tam tak an kal hi a makin a danglamna chu a ni.

         

         Lal Isua nen chuan engkimah a nuam a, nun hi a lo hlim em em thin. Mahse Israelfaten ni 11 kal lek pawh kum 40 lai mai an kal ang khan, Lalpa laka helna vang hian kan nun hi a lo ngui thin a, dam reng chunga thi ang maiin hringnun kan lo hmang thin a lo ni. Lalpan min hrilhfiah a duh fo thin chu Amah chauh en reng chung kan kal hi a ni a, ama ruala kal lova, kan peng thin hian a hlim lo mai bakah kan tan chu chu thil hlauhawm tak a ni tih min hriat sak vangin, min hmangaih vangin hrehawmnate kan chungah a thlen zawk thin a lo ni.

         Lalpa chauh en la, hringnun hi i tan van ram tluka nuamah i siam thei a ni. Hringnunah hian vanram nitin i thlen tir theihna kawng pawh a ni a, Ka thian duh tak Lalpan min hmangaih em em vang hian a ni hetiang kawng tha leh rinawm hi min lo kawhhmuh ni. Amah chauh chu beisei la, beisei tur dik tak i beisei a ni ang, amahah lo chuan hlimna tluantling reng reng a awm si lo. Thuthlungfate chu keimahni hi kan ni a, amah ringtute hi, ram min lo tiam tawh khawizu leh hnute tui luanna hmun nuam leh ram nuam tak mai chu min pe ngei dawn a, chu min tiam ram kan pan mek lai hian kan kawng zawh danah hian a inang thei dawn lo tih erawh kan hriat a tha ang. Engkawng zawhtu nge i nih tih kha nangmah lo inenfiah la ka duh a ni. Ni 11 kal thin nge i nih a, ni 11 kal chauh pawh kum 40 lai thang thin hel mize pu thin zawk i nih? i lo inenfiah dawn nia.. Hringnunah van ram i tem ve ngei theih nan Lalpan malsawm mawlh che rawh se....