Pathian ngeiin a sawi a, a chunga Bible chang kan tarlanah khiang chiang takin kan hmu thei a ni. Lalpa tan engmah harsa a awm lo tih hi hrechiang hmasa phawt la ka duh, hriat erawh chu i naupan tet ata i hriat sa tawh kha a ni a, mahse i hmabak chu hriatchian a ni. Engtinge kan hriatchian ang, tih dan tur ka hre lo i ti a ni maw? Lalpa tan engmah harsa a awm lo tih hre reng chunga i pan ngai lo leh i ring ngam lo hi dawihzep ve tak chu i ni phawt. Mahse ka dem lutuk lo che nangmahah khan dawizep-pa (setana) chuan a bei che pawh a ni thei ve bawk e.
I tawngtai a, i dil a, i mangang hle si thin em? Lalpa rinchhan i inti a, i buai hle si thin em? Tawngtai hi ringtute tih tur a ni tih vang mai a tawngtai nge i nih, i dilna pa (Pathian) hi i hriatchian vanga dil zawk? Tu zawk hi nge i nih nangmah kha lo inbih chiang ang che. Pathian hnenah tawngtaia dil thinteah hian mi chi hnih chu kan awm ngei alawm. Dil reng chunga mangang hle thin i nih chuan i nihna dik tak chu "hretu" i ni a, "hrechiangtu" erawh i la ni lo a ni. I chungthu hi Pathian kuta awm a ni a, lal thinlungte pawh hi Pathian kuta awm a ni asin, a thu thu a ni a, engkim chunga roreltu a ni. Tawngtaia i dil kha hmutawhah inngai la, lo buai vak duh tawh suh i hah thlawn mai mai a ni. Lalpa hnenah thil i dil a, i ring ngam leh si lo a, nangman thawhchhuah i tum leh thin vang hian Lalpan i chungah a thiltihmak ropui a lanchhuahtir thei lo va, i lo chet ve vak vak thin vang hian Lalpa kawng i dal zawk a ni. I dil tawh chuan amahah inngat tawp la, a lo thleng ngei ang. A lo thleng lo a nih pawhin lawm tho la ka duh. A chhan chu kan dil zawng zawng hi Pathianin min pe ngai lo va, kan tana tha tur leh kan mamawhte chauh min pek thin vang a ni.
A nih chuan Pathian chuan engkim a ti thei lo tihna em ni? ni lo ve, a ti thei lo ni lovin, a hmangaih vang zawk chein a tihsak lo che a ni. Hmangaih vanga tihsak lo chu enge a awmzia? A chhanna chu i dil zawng zawng hi nei vek ta la, Amah Pathian ngei chu i theihnghilh thuai dawn tih a hriat avangin, Lalpa i theihnghilh vaih chuan i nun chu laktlak a awm lovang. Lalpa nei reng chung maha heti i nih chuan nei lo phei la chuan engtinnge i awm ang han ngaihtuah chiang mah teh.
Tehkhin thu pakhatin lo sawi ila, fapa i nei a, i duat em em a, i fapa chuan inkhawmna tur kawrmawi leisak turin a dil che a, i lei sak ngei a, i fapa vek chuan zu a dil leh che a, i pe ang em? I pe a nih chuan i fapa chu i hmangaih lo tihna a ni thei ang. Mahse i fapa dik tak a nih ngai chuan chu chu i tihsak tawp lovang. A chhan chu mahni rila rah kan fate chu kan hmangaih em vangin an tan thiltha lo chu kan khap sak a, thiltha chu kan pe thin. Sual kawng an zawh kan hlau a, an sualin kan zilhhaua kan vaw thin a ni lawm ni? Chutiang chuan a ni , Lalpan keini a fate hi min engkawl thin ni. Lalpa hnena kan dil apiang mai hmuh vek tum mi chu mi duham tak a ni a, nuamsakna um mi a ni.
Lalpan i mamawh chu a hria, lungngai suh, thlapang suh, mangang hek suh, i buaina engkim Lalpa hnen thlen la, Anin a lo chhawk dawn che a ni. I chungthu, i engkimah Lalpaah inngat tawp la, i tan kawng tha ber a kawhhmuh chein i tan Lalpa chu a ding zel ang. I tana tha lo tur paih bo sak chein i tana tha tur kawngah a hruai ang che. Ama hruainaah chuan zui la, lawmin i lo khat ang. I mangan a hnen thlen la, Anin a lo tanpui zel ang che.... Amen...
No comments:
Post a Comment