28:19 Chutichuan kal ula, hnam tina mi zirtirahte siam ula, Pa leh Fapa leh Thlarau Thianghlim hmingah chuan baptis ula,
28:20 thu ka pek zawng zawng che u pawm turin zirtir rawh u. Tin, ngai teh u, kei kumkhuain, khawvel tawp thleng pawhin, inhnenah ka awm zel ang," a ti a.
A chunga Bibile chang kan tarlan takah hian chiang kekkawkin thlaphang lo turtein min hrih. A chhan chu kan awmna hmun hi thlaphanna leh manganna ram a ni tlat vang a ni. Lungaih awm lohna hmunah "lungngai suh" va tih hi a tangkai loh mai bakah, a tul lo a ni. Lal Isuan kan awmna hmun leh ram hi a hrechiang em em a, hmelmapa chuan min beiin kan lungngai leh dawn a ni tih hi a chiang em vangin, thu chah ropui leh thlamuan thlak tak mai min hnutchhiah zawk a lo ni.
Lal Isua chu lei leh vana Lal a ni a, a thiltihtheihzia leh ropuizia chu a thiltih leh a tih leh turte hian a hrilhfiah a, a ropuina pawh kan mithmuh leh hriatte hian a tichiang hle a ni. Khawvelah hian Lal te neiin ram ropui tak tak din a ni tawh thin a, tunah ngei pawh hian chutiang chu tam tak a la awm. Mahse Lal ISUA erawh chu ram khat lal a ni lova, lei leh van LAL a ni zawk. Amah chu engkim bul leh tawp a ni a, a hnen atang lo chuan van ram thlen theihna kawng a awm lo.
Chuti khawpa Lal leh thiltithei ni siin i tan enge a nih ve le? A thiltihtheihziate kan sawi thin a, i nunah i tawng fuh ve tawh ngai em? Lal a nih ziate kan hria a, I Lal a ni ve em? Lei leh van lal ni mahse, mi zawng zawng Lal erawh a ni si lo. A awmzia chu Isua chu Lei leh vanah hian khawikipah pawh hian Lal a ni lo tihna ni lovin, Lal atan i pawm lo a, i duh loh vang zawkin I lal a ni lo thei a ni.Mi zawng zawng Lal ni mahse, mi zawng zawngin Lalah an hmang lo va, an pawm bawk loh vangin a thiltihtheihziate an hmuin an hre lo mai zawk ani.
Bible chuan rinna chu hriatna atang a lo awm a ti a, a dik hle mai, ring tur chuan a hmasa berin kan hriatchian phawt a ngai a, kan hriatchiang hnu chauhin kan ring thin. "Ring" tih hi a ril hle a, va ring lam a kawk lova, ring tih chu "chawl" tihna lam zawk a ni. Ring rawh a tih che chuan amahah chuan chawl rawh tih tluk a ni. Tawmpui tite pawhin a sawi theih tho awm e. A thiltihtheihna leh ropuina chu kan ring chuan kan tawmpui/chawl tihna a lo ni. kan chawlh tawh chuan kan thawhchhuah a ni lova, engkim thawhtawhsaah khan kan chawl mai zawk a lo ni.
Awle, kan thupui nen a inpersan tep tlat a, thupuiah lut leh dawn ila, ring tih ka han sawi deuh duah chhan chu Isua chu Lal a ni a, engkim chungah thuneitu ber a ni kan ti a, i tan Lal a ni ve leh ve loh lam kha ka sawi tum ber chu a ni. I tan Lal nih chu englai pawhin a duh reng a, Lal atan i pawm erawh a ngai thung a ni. Lal atan i pawm tur a ni ka tih vangin mihring thiltih lam sawi tum ka ni lo va, "chawl" rawh tih lam hawi a sawi tum zawk ka ni. Lalpa Isuaa chawlh chu a hahdam a, a thlamuan thlak em em bawk, he lei hringnun hrehawm tak hi i tan van ram ang tluka nuam taka i hman theihna kawng chu Isua chauh hi a ni.
I mangang a, i phur a rit hle a, i thlaphang em em thin em? Chu i phurrit chu ISUAN a chhawk sak thei che a sin. Amahah chuan chawl la, thlamuangin i awm dawn nia. Mangan thlaphan khawharnate hi khawvel kan awm chhung hian a bo dawn lo va, chutiang awm reng chunga thlamuanna kawng chu kan sawi zawk a ni. Chu Isua chuan enge a sawi " Thlamuan takin awm rawh" a ti che a sin. I thla a phang em em a, i mangang em em bawk a, i beidawng em em bawk thin em? "Thlamuang takin awm raw" titu i nei a ni. Amah chu ram khat awptu Lal mai mai a ni lova, Lei leh van Lal ber a ni. A thlamuan thlak a sin, lei leh van Lal ber kan hnena a awm hi engmah reng hian a hen zo long e. Amen ???
No comments:
Post a Comment